ДЭМБ-аас хүн өдөрт 5 граммаас ихгүй давс хэрэглэх ёстой гэж зөвлөдөг. Гэтэл манай улсын хувьд насанд хүрсэн хүн өдөрт дунджаар 11.1 грамм давс хэрэглэдэг бөгөөд баруун аймгуудад хоногт 18-19 грамм давс хэрэглэдэг гэсэн тооцоо гарсан байна. Иймээс Монгол улс номхон далайн баруун бүсийн давсны хэрэглээ өндөртэй орны тоонд зүй ёсоор ороод байгаа аж.

Мөн Монгол хүн хоногт хэрэглэж буй давсныхаа 46.2%-ийг цайнаас, 33.5%-ийг хэрэглэж буй хоол хүнснээсээ авдаг байна. Мөн бидний өдөр тутамдаа худалдан авдаг хүнсний 75%-д давс далд хэлбэрээр агуулагддаг. Тиймээс хүнсний бүтээгдэхүүний шошгийг шалгаж, давс бага хэрэглэснээр тархины цус харвалтыг 24 хувь, зүрх судасны өвчнийг 18 хувиар бууруулах боломжтой юм.