Дуучин О.Баянмөнх уран бүтээлдээ эх орон, цэрэг эрс, Монгол бөхчүүдээ магтан дуулсан дуунууд түлхүү туурвидаг. Тэрбээр төрийн шагналт зохиолч Д.Норовын бичсэн, 60 ангитай “Босго, тотго” уран сайхны киноны дууг олонд хүргэсэн.

Хүмүүсийн сонсох дуртай энэ дууны шүлгийг Ардын уран зохиолч П.Бадарч, хөгжмийг Урлагийн гавьяат зүтгэлтэн Т.Сэр-Од бичжээ. Дуучин залуу өмнө  нь “Анд нөхдийн дуу”, “Адуун тэнгэртэй аав″, “Монгол бvсгvй″, “Сэтгэлийн гэрэл”, “Их аварга”, “Наран доторх наадам”, “Омогшил” “Хайрын дуу”, “Анхны болзоо”, “Буурлын нутаг” зэрэг бүтээлээ түгээсэн билээ.

“Хөх Монголын хүчтэнүүд” анхны цомгоо гаргаж, “Омогшил”, “Бид мартаагүй” тоглолтоо толилуулсан тэрбээр энэ сарын 25-нд Монгол Бөхийн Өргөөнд “Тусгаар тогтнол” зургаа дахь бие даасан тоглолтоо өргөн барих гэж буй. Чингис хааны үеэс олон зууны ээдрээт түүхэн замнал туулж, тусгаар тогтнолоо олсныг театрчилсан шоу хэлбэрээр хүргэх гэнэ.  

                                                                                           Г.Золзаяа