Төгөлдөр хуурч С.Саянцэцэг  “Төгөлдөр хуурч С.Саянцэцэгийн уран бүтээлийн үдэш” уран бүтээлийн тоглолтоо хийхээр зэхэж буй. Тэрбээр Испани улсад зохион байгуулдаг Олон улсын хөгжмийн наадамд оролцож, хамтран тоглож байсан Орос, Австри, Испани уран бүтээлч андуудаа энэ сарын 21-нд толилуулах тоглолтдоо урих гэнэ.

Төгөлдөр хуурч бүсгүй хөгжмийн зохиолч  аавынхаа “Зулай цагаан Алтай”, “Тэмээчин ээж” зэрэг бүтээлийг тоглож, үзэгчдэд бэлэг барихаар шийджээ. Тоглолтын хоёр дахь өдөр буюу 22-нд “CROCUS”-т “Испанийн үдэш” үдэшлэгтэй. Тэр үдэш тус улсын үндэсний алдарт урлаг Фламинко-г монголчууд эх орондоо анх удаа хүлээн авч, холын уран бүтээлчидтэй хамтран дуулж, бүжиглэж  өнгөрөөх нь.

С.Саянцэцэг “Би Испанид төгөлдөр хуурчдын Олон улсын хөгжмийн наадам олон жил зохион байгууллаа. Эх орондоо ийм наадам зохион байгуулах юмсан гэж боддог. Монголдоо ирж ажиллаад хоёр жил боллоо. Өөрт байгаа эрдмээ бусдад зааж өгөхсөн гэх хүслээ биелүүлж яваадаа баярладаг. Тиймээс хүсэл мөрөөдлөө анд нөхөд, үзэгчидтэйгээ хуваалцахаар шийдсэн юм” хэмээжээ.  Монголд Испани үндэстний нэрийн хуудас болсон алдарт Фламинко ирэх нь ээ.

                                                                                      Г.Золзаяа