Баруун Африкийн орнуудад тусламжаар ажиллаж байгаа эмч нар өчигдөр эбола вирусын тархалтын талаар мэдээлэл өгсөн бөгөөд Сьерра Лион улс даяар болон тус улсын нийслэл Фрий таунд энэ долоо хоногийн байдлаар вирусын тархалт улам нэмэгдэж байгааг анхааруулжээ. Тус улсын эмнэлгийн байгууллагууд өндөр ачаалалтай ажиллаж байгаа бөгөөд түргэн тусламжийн дуудлагын 85 хувьд хариулж чадахгүй байгаа талаар мэдээлж байна. Түүнчлэн эбола вирусын улмаас амиа алдсан хүний тоо ихсэхийн зэрэгцээ өнчин хүүхдийн тоо эрс нэмэгдэж байгаа нь бас нэгэн тулгамдсан асуудал болоод байгаа юм.