Зүгээр л одоо болоо юм биш үү гэж улстөрчдөөс асуумаар байна.  Сандал  суудлаас зуурч нам, фракцаа гэх жижиг эрх ашгуудаа өндөрт өргөх гэж чардайхад та нарын гар эцэхгүй байна уу. Улстөрийн нүүдэл харж байгаа нь гээд хоол, хор найруулж гүйсээр   та нарын хөл чинь цуцахгүй байна гэж үү. Хамгийн  гол нь энэ бүхний ард Монгол Улс, сонгуулиар та нарыг гээд итгэсэн ард түмний итгэл хөсөр хэвтэж дээгүүр нь өөрсдөө нь алхаад байгаагаа олж харахгүй байна гэж үү.

УИХ-ын намрын  чуулган  нээлтээ хийснээс хойш нэг сарын хугацаа өнгөрсөн ч энэ УИХ Төрөөс төмөр замын тээврийн талаар баримтлах бодлогыг баталснаас өөрөөр ажил хийж гийгүүлсэнгүй. Энэ намрын чуулганаар УИХ 20 гаруй хуулийн төсөл хэлэлцэж батлахаар жагсаалт гаргасан. Гэвч сарын хугацааг огцорно, огцрохгүй, тэрийг томилно,  энийг  сугална гэсээр өнгөрөөснөөс дээрх жагсаалт тэр чигээрээрээ гишүүдээ хүлээн үлдлээ. Тодруулбал, чуулганы нээлтийн маргаашаас л Н.Алтанхуягийн Засгийн газарт хийх  бүтцийн өөрчлөлтийн тухай яригдаж,  засгийн тэргүүн өөрийгөө авч үлдэн зарим сайдаа өөрчлөхөөр төсөл өргөн барьсан ч явцын  дунд МАН Алтанхуягийг унагахаар шийдсэнийг бид мэднэ.

Ерөнхий сайд Н.Алтанхуягийг огцруулах бичгийг МАН-ын 28 гишүүн өнгөрсөн сарын 17-нд УИХ-ын даргад  өргөн  барьсан. Хуулиараа бол Ерөнхий сайдыг огцруулах асуудлыг УИХ-д  өргөн барьснаас хойш саналыг 7 хоногийн дотор Байнгын хороогоор хэлэлцэж дүгнэлт гаргах ёстой.  Дүгнэлтийг мөн л 7 хоногийн  дотор чуулганаар  хэлэлцэж асуудлыг нэг мөр болгоно гэж хуульд тодорхой заасан байдаг. Тэгэхээр 14 хоногийн  дотор УИХ-аар  шийдэгдэх ёстой байсан Н.Алтанхуяг сайдын засгийн асуудал ийнхүү 18 хоног өнгөрч хуулийн хугацаа өнгөрсөн ч  сунжирсаар байна.

Байнгын хороодоор Засгийн газрын асуудлыг хэлэлцэхээр оруулж ирсэн ч МАН, АН-ынхан ээлжилж 2  удаа завсарлага авснаар улстөрд  хүлээлт үүссээр удлаа. Өнөөдөр гэхэд УИХ-ын  байнгын хороод ирц хүрээгүй гэх шалтгаанаар хойшилж төлөвлөгөөт хуулийн төслүүдээ арагш нь тавилаа.

Уг нь энэ чуулганаар гишүүдийн хэлэлцэж ард нь гарах ёстой том ажил бол 2015 оны төсөв. Хуулийн хугацаагаар бол 11 сарын 15-нд багтааж УИХ ирэх оны төсвөө 4 шатны хэлэлцүүлгээр батлах номтой. Гэвч аравхан хоногийн хугацаа үлдээд байхаад УИХ төсвийн төслийн анхны хэлэлцүүлгийг л хагас хугас хийж амжаад  байна.

Эдийн засгийн хямрал нүүрлэсэн, гадаадын  хөрөнгө оруулалт буурч, ажилгүйдлийн түвшин  ихэссэн, төгрөг унаж вальют чангарсан энэ үед ирэх оны төсвийг өдөр шөнөгүй нухан чамбайруулж гэмээнэ бидний хэн хүнийх нь амьдралд илүү тусах нь лавтай.

Одоо улстөрийн “халуун”-аа тохируулж, зөв  нүүдэл хийх гэсэн шаналгаагаа дуусгаж АН хөзрөө даруйхан дэлгэ л дээ. Боловсон хүчний дутагдалд орж, хүчтэй зангарагтай лидер цөөн болсон  АН-ынханд тэгтэл удаан  бодох олон   хувилбар баймгүй л санагдана. Хэчнээн олон  хувилбартай, маргаан мэтгээн ихтэй байсан ч цаг  хугацаа, ард нь гарах ёстой их ажлаа бодоод энэ сунжралдаа цэг тавих  болсон. Шадав нь авна уу, Готов нь авна уу хамаагүй би л эцгээ өргөх минь гэдэг шиг улстөржилтөө “унтрааж” бүхэл бүтэн улсын хууль тогтоох дээд байгууллага нь байна даа ажилласан шиг  ажиллавал яасан юм бэ.

Б.Намжилмаа