АНУ-ын Мичиган мужийн Флинт хотын хэсэг бүлэг хүмүүс пүрэв гарагт харъяа шүүхдээ гомдол гаргалаа. 100 мянган оршин суугчтай тус хот ундны цэвэр усаа ойролцоох Хюрон гэх нуураас татдаг байснаа хоёр жилийн өмнө Флинт голоос авах болжээ. Өнгөрсөн аравдугаар сард бага насны хүүхдүүдийн цуснаас их хэмжээний хар тугалга илэрч, улмаар ус дамжуулах хоолойнд  асуудал байгааг тогтоожээ. Тэгвэл ундны эх үүсвэрийг шилжүүлэх ажлыг гүйцэтгэсэн, инженерийн чиглэлээр үйл ажиллагаа явуулдаг хоёр компани өнөөдөр шүүхэд татагдаж, хотын иргэд тэднээс мөнгөн төлбөр нэхэмжилж байна. Түүнчлэн иргэд усны төлбөрөө буцаажавах, хар тугалга агуулсан усны хоолойнуудыг нэн яаралтай солих зэргийг шаардаж шүүхэд нэхэмжлэл гаргахын зэрэгцээ, цэвэр усны хямрал нүүрлэсэн үед Мужийн захиргаанаас шаардлагатай арга хэмжээг цаг алдалгүй авч чадахгүй байна гэж үзэн Мичиганы захирагч Рик Снайдерийг суудлаасаа огцрохыг шаардаж байна.