УИХ-ын Төрийн байгуулалтын байнгын хорооны өнөөдрийнхуралдаанаар УИХ-ын нэр бүхий 28 гишүүний өргөн барьсан Монгол Улсын Ерөнхий сайд Н.Алтанхуягийг огцруулах саналыг хэлэлцэхээр товлосон байв. Байнгын хорооны хуралдаан 9 цаг 24 минутад 52.6 хувийн ирцтэй эхэлж, хуралдаанаар хэлэлцэх асуудлаа баталсан ч энэ үеэр УИХ дахь АН-ын бүлгийн дарга Д.Эрдэнэбат Ерөнхий сайдыг огцруулах саналтай холбогдуулан тус намын бүлэг ирэх долоо хоногийн лхагва гараг хүртэл завсарлага авах хүсэлт гаргав. Тэрээр Ерөнхий сайдыг огцруулахтай холбогдсон болон цаг үеийн бусад асуудлын талаар УИХ дахь АН-ын бүлэг өчигдөр хуралдсан. Гэхдээ чуулганы нэгдсэн хуралдааны хэвийн үйл ажиллагааг хангах үүднээс хуралдаанаа түр завсарлуулсан. Өнөөдрийн чуулганы нэгдсэн хуралдааны дараа үргэлжлүүлэн хуралдаж ярилцах шаардлагатай байна гэдгийг хэлсэн юм.

УИХ-ын гишүүн М.Энхболд, Л.Цог нар УИХ-ын нэр бүхий гишүүдээс Ерөнхий сайдыг огцруулах саналаа өргөн бариад 14 хонож байна. Энэ бол зөвхөн нэг намын бүлэг, УИХ-ын хэдэн гишүүнээс тавьж буй асуудал биш, ард түмний олонхын санаа бодлын илэрхийлэл юм. Гэтэл асуудлыг хуулийн хугацаанд нь хэлэлцэн шийдвэрлэх талаар байнгын хороо санаачилга гаргахгүй байна гэдгийг энэ үеэр хэллээ.