Дижитал хамтлагийн дуучин Эрка хаягдал ундааны савыг дахин ашиглаж хогийн сав хийн сурагч хүүхдүүдэд бэлэглэжээ. Эх дэлхийгээ хайрлаж, хог хаягдлыг шинэ зорилгоор хэрэглэж, амьдрал ахуйдаа хэрхэн ашиглахыг бодитоор үзүүлдэг ШБОС нэврүүлэгт Эрка анхны зочин болж уригдсан байна. Тэрээр хогийн савнаас хаягдал ундааны сав цуглуулангаа  “Хүний ухамсрыг тодорхойлдог хамгийн гол зүйл нь хогийг хогийн саванд хийх. Хотын иргэн энэ соёлд хамгийн түрүүнд суралцсан байх хэрэгтэй” гэж ярьж байв. ШБОС нэвтрүүлгийн хөтлөгч У.Эрхбаярын хамт цуглуулсан ундааны саваа авч, 72-р сургуульд очиж, хогийн сав хийсэн байна.

Тус сургуулийн зураг, технологийн багш Л.Амарсанаа ундааны хаягдал саваар цэцгийн сав, сандал, хогийн сав гээд олон зүйл бүтээж болно гэсэн санал гаргаж, харин Эрка хогийн саванд хийдэг ундааны саваар хогийн сав хийх санааг дэмжлээ. Энэ үеэр Эрка Дижитал хамтлаг энэ жил Европ тивийг бүтэн тойрохын зэрэгцээ, БНСУ-д тоглосон, 2016 он гарахаас өмнө АНУ-д тоглох зорилготой байгаа талаараа ярьжээ Мөн аялан тоглолтын бичлэгүүдээр тус хамтлагийн “Харьд” дууг клипжүүлсэн байна. Харь оронд ажиллаж, амьдарч байгаа Монголчуудтайгаа хамт дуулж, уйлж, сайхан цаг мөчийг хамт өнгөрүүлсэн маань дурсамж болж үлдсэн байна. Амттай сайхан яриа өрнөсөөр нэг л мэдэхэд багтаамж ихтэй хогийн сав бэлэн болсон байлаа.