Эхний тойрогт төдийлэн сайн байгаагүй “Эрчим”-ийнхний тоглолт сайжирч, тэмцээний II тойргын тоглолтод  хүснэгтийг тэргүүлж явсан “Алтайн Барс-1” багтай ширүүхэн өрсөлдөв. Эхний ээлжинд 25:14 оноогоор “Эрчим” учраагаа хожив.

Тус багийнхан алдаа гаргалгүй хоёр дугаар ээлжинд 25:23,  гуравдугаар ээлжинд 26:24 оноогоор буюу 3:0 харьцаагаар хамгийн хүчтэй өрсөлдөгчөө буулгаж авсан. Тэд гурав тоглож, нэг ч хожигдолгүй 9 оноо авч хүснэгтийг тэргүүлж эхэллээ. “Эрчим” гурван  удаа тоглож, есөн ээлж хожихдоо нэг ээлж алдсан юм. Хүснэгтийн сүүл мушгиж яваа “Аврагч”, “Буянт-Ухаа” баг дахин хожигдсоноор оноо авч чадсангүй.

“Супер-8” тэмцээний Б хэсийн нэг тоглолт өнөөдөр болж, Өмнөговийн хөвгүүд “Хасу мегастарс”-ыг  3:1 оноогоор хожсоноор Дундговийн багийн хамт хэсгээ тэргүүлж буй. Энэ хэсгийн тэргүүн байрын төлөө ижил зургаан оноотой яваа Өмнөговь, Дундговь багийн тоглолт өнөөдөр 10 цагаас эхэлж байна. 

                                                                                                                Г.Золзаяа