Токио хотоос зүүн өмнө зүгт орших Ёкохама хотын их дэлгүүрт мөлхөө тамирчдын гурван метрийн уралдаан бүтэн өдрийн турш зохиогджээ. Зургаан зуун нэгэн мөлхөө тамирчин оролцсон тус тэмцээний хамгийн залуу оролцогч нь зургаан сартай, хамгийн ахмад нь нэг ой дөрвөн сартай байсан гэнэ. Зарим хүүхдүүд гурван метр зайг богино хугацаанд туулж барианы шугаманд хүлээж байгаа эцэг эхдээ очсон бол зарим нь гараанаасаа л гаралгүй тэмцээн дуустал уйлсан байна. Энэхүү арга хэмжээ нь өнгөрсөн онд БНХАУ-д зохиогдсон 451 мөлхөө тамирчдын уралдааны дээд амжилтыг эвдэж Гиннесийн номонд бичигдэх зорилготой зохиогдсон байна. Мөлхөө уралдааны тэргүүн байр эзэлсэн тамирчин бүрэн тоноглолтой дижитал камераар шагнуулжээ.