Энэ оны эхний есөн сарын байдлаар улсын хэмжээнд 713 мянга гаруй тээврийн хэрэгсэл хөдөлгөөнд оролцож байгаагийн 440 орчим мянга нь нийслэл Улаанбаатар хотод байна. Монгол улсын хилээр сард дунджаар 2900 суудлын, 650 ачааны машин орж ирж буй гэсэн статистик бий. Жилээс жилд өсөн нэмэгдэж байгаа автомашины тоо хэмжээг дагаад засвар үйлчилгээний салбарт томоохон зах зээлийг бий болгож, тэнд мэргэжилтэй ажиллах хүчний эрэлтийг нэмэгдүүлж байгаа юм. Улсын хэмжээнд авто засварын үйлчилгээ эрхэлдэг том жижиг аж ахуйн нэгж 700 орчим бий. Тэдгээрийн кузов засвараар дагнасанд нь голдуу гадныхан ажилладаг нь манайх үндэсний мэргэжилтэн бэлтгэдэггүй байсантай холбоотой. Тэгвэл Г.Баярсайхан сайдын санаачилгаар авто кузов засварчны анги “Монгол-Солонгосын политехник коллеж”-д энэ сард нээгдсэн байна.