Ази номхон далайн бүсийн улс орнуудын Иргэний нисэхийн асуудал эрхэлсэн байгууллагуудын дарга, захирлуудын 52 дахь удаагийн хурал Филиппин улсын нийслэл Манила хотод болж ИНЕГ-ын даргын үүргийг түр орлон гүйцэтгэгч Г.Нямдаваа тэргүүтэй төлөөлөгчид оролцоод ирлээ.  

Үндэсний агаарын тээвэрлэгч МИАТ ХК нь АНУ руу шууд нислэг үйлдэхээр төлөвлөж байна. Мөн Монгол Улс АНУ-ын Холбооны нисэхийн удирдах газар (FAA)-аас хийх Аюулгүй ажиллагааны аудит шалгалтанд хамрагдаж САТ 1 эрх авах бэлтгэл ажлыг хангах зорилгоор АНУ-ын төлөөлөгчидтэй тусгайлсан уулзалт хийсэн байна. ИНЕГ-ын дарга Г.Нямдаваа уулзалтаар хоёр байгууллагын хамтын ажиллагааг эрчимжүүлэх, Монголын ИНЕГ-ын нисэхийн аюулгүй ажиллагааны хяналтын байцаагч нарын ур чадварыг сайжруулах, дадлага туршлага эзэмшүүлэх үүднээс FAA-ээс нислэгийн үйл ажиллагааны болон нислэгт тэнцэх чадварын хяналтын байцаагчийг Монголын ИНЕГ-т богино хугацаагаар (1-2 сар) томилон ажиллуулж, туршлага хуваалцах талаар хүсэлт тавьсан. АНУ-ын Холбооны нисэхийн удирдах газраас хамтран ажиллахад бэлэн байгаагааа илэрхийлж  FAA-ын байцаагчаар ажиллаж байсан  туршлагатай мэргэжилтнүүдийг  олж зуучлаж өгөх талаар харилцан тохиролцжээ.