Энэ жил 47 настай Жюди Браун нэлээд жин нэмж байгаагаа мэдсэн ч түүний насны бүх бүсгүйчүүдэд тохиолддог цэвэршилт гэж бодсоор ирсэн байна. Саяхны нэг өдөр гэдсээр нь хүчтэй хатгуулж эмнэлгийн тусламж авахаас өөр аргагүйд хүрчээ. Бостоны захын эмнэлэгт нөхөртэйгөө хамт очиход эмч бүсгүй "Сайн мэдээ гэвэл гэдэсний түгжрэл болоогүй байна. Харин та жирэмсэн юм байна. Таны охины төрөх үйл явц эхэлсэн" гэж хэлэх үед л ямар гайхамшиг тохиосныг ойлгосон байна. Брауныхан гэр бүл болоод 22 жил болж байгаа ч ийнхүү анхны хүүхэд нь мэндэллээ. Ноён Браун "Тийм ээ, бид хоёр илүүдэл жинтэй хүний гэдэс ийм хатуу байдаггүй дээ гэж ярилцаж байсан" гэжээ. Мөн "Би удахгүй эмнэлгийн хүлээн авахын өрөөнд сэрэх байх. Энэ бүхэн магадгүй сайхан зүүд байх" гэж нэмж хэлжээ. Гэр бүл болоод хорин жилийн дараа мэндэлсэн анхны охиндоо ноён, хатагтай Браун "Каролин Рос" гэх нэр хайрлажээ. Аав ээждээ гэнэтийн бэлэг болсон ирсэн охин 3.6 кг эрүүл төржээ.

Бэлтгэсэн Б.Агай