Өмнөд Каролина мужийн Флоренф хотод амьдардаг 23 настай Жулиан Хамлин нүдний контакт линз хэрэглэснээс улбаалж эрүүл мэндээрээ хохирсон нэгэн юм. Түүний сургамжтай түүхийг хуваалцаж байна.

Захирлын туслах, хүлээн авагчаар ажилладаг тэрээр 2010 онд 15 ам.доллароор өнгийн контакт линз худалдаж авсан байна. Энэ төрлийн хямд линзийг маш олон өсвөр насны хүүхдүүд худалдан авч, зүүж гангардаг ба тэр тэдний л нэг байв. Хамлин тухайн үед бараг өдөр бүр нүдэндээ линз зүүдэг, тогтмол нүдний дусаалга хэрэглэж, линзнийхээ усыг сар бүр сольдог байжээ. 

Иймэрхүү байдлаар, харьцангуй хямд үнэтэй нүдний линз бүтэн хоёр жил хэрэглэсний дараа нэг өглөө түүний нүд маш хүнд үрэвссэн байдалтай сэрэв. 

Өглөө нүд нь нэг л хэвийн биш санагдсан учир тэр эмчид үзүүлсэн байна. Үүнээс гурав хоногийн дараа нүднийх нь эвэрлэг бүрхэвч шархалж, зүүн нүд нь юм харахаа больжээ. 

Улмаар нүднийх нь даралт хэт ихсэж тэрээр олон удаагийн мэс засалд орж эхэлсэн байна. Өнгөрсөн таван жилийн хугацаанд түүний юу үзэж туулсан нь даанч харамсмаар.

Жулиан Хамлин 2012 оноос хойш нийтдээ 15 удаагийн нүдний мэс засал оржээ. Үүний долоон удаагийнх нь нүдний эвэрлэг бүрхэвч шилжүүлэн суулгах мэс засалд бөгөөд азаар түүний баруун нүд харах чадвартайгаа үлджээ. Мэс заслын нийт өртөг 250.000 орчим ам.доллар болоод байна. 

"Миний зүүн нүд юм харахаа больсон. Үүнээс болж би ажлаасаа хүртэл гарч, нүдэндээ даралт өгөхгүйн тулд 11 кг-ээс дээш зүйл өргөхөө больсон. Мөн миний баруун нүд одоо маш эмзэг болсон учир нүдний хаалт эсвэл нарны шил үргэлж зүүх шаардлагатай. Нүдний хаалт олон нийтийн газар зүүж явах нь хэцүү л дээ. Хүмүүс ихэнх нь үүнийг маш буруугаар ойлгодог учраас, анх мэс засал дууссаны дараа би олон нийтийн газраар явалгүй гурван сар болсон. Тэр хугацаанд миний гэр бүл л надад тусалж байсан" хэмээн тэр ярьжээ. 

Нүдний контакт линк зүүх нь нүд хүчилтөрөгчөөр амьсгалах боломжийг олгодоггүй, нүдний эвэрлэг бүрхэвчийн эрүүл мэндэд ноцтой асуудал үүсгэдэг учраас эмч мэргэжилтнүүд аль болох линз хэрэглэхгүй байх, хэрэглэсэн ч бага хугацаагаар зүүхийг зөвлөдөг.