Японоос гаралтай Якуза бол дэлхийн хамгийн хатуу дэг жаяг, зохион байгуулалттай гэмт хэргийн бүлэглэл билээ. Зөвхөн Японд өнөөдөр ойролцоогоор 100.000 Якуза нар байдаг гэсэн судалгаа байдаг. 

Тэднийг таних хамгийн гол зүйл бол бие, нуруун дээгүүрх өвөрмөц шивээс юм. Уг шивээс нь тэдний хувьд бахархлын билэг тэмдэг, бусад гэмт хэргийн бүлэглэлүүдээс ялгарах гол онцлог нь. 

Эдгээр гэрэл зургуудийг Антон Кустер хэмээх гэрэл зурагчин авсан юм. Тэрээр Токио хотод Якуза нартай хамт хоёр жилийг өнгөрүүлж, Якуза нарын амьдралыг өөрийн гэрэл зургийн дуранд урьд өмнө олон нийтэд дэлгэгдэж байгаагүй байдлаар буулгажээ. Мөн зөвхөн Якуза нарын амьдрал, гэмт хэрэг, өөрийнхөө нүдээр харсан гэмт хэргийн тохиолдлуудын тухай бичсэн гэрэл зургийн номоо хэвлүүлсэн нь маш хурдан зарагдаж дууссан байна.

Тэрээр номондоо залуу Якуза нар толгойлогчоосоо уучлал гуйхдаа нэг хуруугаа өөрсдөө огтолдог өвөрмөц жаягийн талаар бичсэн байв. Энэ нь бүлгийнхээ төлөө өөрийн зүгээс гаргаж буй нэгэн төрлийн золиос бөгөөд гэм буруугаа хүлээн зөвшөөрч буй утгыг илэрхийлдэг тухай тэрээр бичжээ. 

Якуза бүлэглэлийн толгойлогчид нийгэмд маш өндөр байр суурьтай байх ба залуу гишүүдээрээ яг л хаан мэт хүндлүүлж, гудамжинд таарсан энгийн иргэд хүртэл тун болгоомжтой зөрж өнгөрдөг. 

Бүлэгт шинээр элсч буй залуу гишүүд бие хамгаалах тулааны урлаг болон бясалгалаар хэсэг хичээллэдэг ба ахмад үе нь тэдэнд зааж сургаж, уламжлалаа бага багаар танилцуулна.

Японд хамгийн анх Якуза нар 1600-аад онд бий болсон. Нийгмийн бүхий л давхаргад Якуза нар байдаг ба тэд одоо ч хүчээ алдалгүй, ноёрхсон хэвээр байна.