Нийслэлийн 3-р амаржих газар буюу “Амгалан” амаржих газрын 150 ортой шинэ байр өчигдөр /Х.1/ ашиглалтад орж нээлтээ хийлээ.
“Амгалан” амаржих газрын нээлтийн арга хэмжээнд Улсын их хурлын дарга З. Энхболд,  НЗДТГ-ын орлогч дарга Ц.Энхцэнгэл, УИХ-ын гишүүдийн төлөөлөл , НЭМГ-ын дарга Ш.Энхбат, Баянзүрх дүүргийн ЗДТГ-ын удирдлагууд  оролцлоо.

Тус амаржих газар нь 45 ортой жилдээ 6000 эх төрж 10000 эх хэвтэн эмчлүүлдэг байсан бол өнөөдөр Япон Улсын Засгийн газрын 1.5 сая ам.долларын буцалтгүй тусламжийн хөрөнгөөр орчин үеийн тоног төхөөрөмж, аппаратаар тохижуулж 9000 ам.метр талбайд 412 өрөө, 150 ортойгоор 220 гаруй эмч, эмнэлгийн ажилчидтай, хүчин чадлын хувьд 3 дахин нэмэгдэж, эмнэлэг ачаалал ихтэй үед орны тоогоо 100-аар нэмэгдүүлэх боломжтой 7 давхар төрөх эмнэлэг болон  өргөжиж   үйл ажиллагаагаа явуулах болж байна.

300 гаруй мянган хүн амтай Баянзүрх дүүрэгт 150 ортой тус амаржих газар ашиглалтанд орсноор төрөлт, нярайн тусламж үйлчилгээ, охид, эмэгтэйчүүдийн өвчлөл, жирэмслэлт нөхөн үржихүйтэй холбоотой оношилгоо, эмчилгээ сувилгаа, мэс засал, нөхөн сэргээх эмчилгээнүүдийн  шинэ төрлүүд нэвтэрч, нийслэлийн   хүн амд үзүүлэх эмнэлгийн тусламж үйлчилгээний  чанар хүртээмж нэмэгдэж үйлчилгээний төрлүүд олшрох юм.