Аялал зугаалгын улирал эхэлж буй энэ үед хачигт хазуулах тохиолдлууд нэмэгдэж буйтай холбогдуулан НЭМГ-аас дараах сэрэмжлүүлгийг иргэдэд хүргэж байна. Саяхан гэхэд Сэлэнгэ аймгийн Хүдэр суманд хачигт хазуулан 66 настай иргэн амиа алдсан тохиолдол гарсан билээ. Тэрээр өнгөрсөн сарын 24-ны өдөр малдаа  явж байгаад хачигт хазуулжээ. Удалгүй түүний биеийн байдал муудаж, нийслэлд хүргэгдэн ирж эмчлэгдэж байгаад нас барсан юм. Мөн тус аймгийн Ерөө сумын харьяат 33 настай эмэгтэй С толгойдоо гурван удаа хачигт хазуулж, ухаан алдан унасан хэрэг гарсан байна. Тэрээр одоо Дархан-Уул аймгийн Нэгдсэн эмнэлэгт эмчлүүлж байгаа ажээ.