Энэ харамсалтай хэрэг өчигдөр өглөө 9 цагийн орчим болжээ. Нийслэлийн Баянзүрх дүүргийн 14 дүгээр хорооны нутагт баригдаж буй барилгын дэргэдүүр явж байсан иргэн Г /48 настай, эмэгтэй/-ийн дээрээс төмөр унаж амиа алджээ. Тус барилгын 10 давхраас уг төмөр унасан байна. Энэ хэргийн дуудлагыг Нийслэлийн Онцгой байдлын газар 18-ны өдрийн 09:36 цагт хүлээн авч Аврах ангийн 8 албан хаагч, 2 автомашинтайгаар ажиллан талийгчийн цогцсыг дүүргийн Цагдаагийн хэлтэст хүлээлгэн өгчээ. Барилгын компаниуд аюулгүй ажиллагааны дүрмийг хангаж ажилладаггүйгээс болж ийнхүү нэг иргэн амиараа хохирлоо.