Элэгний С вирүсийг эмчлэх ХАРВОНИ эмийг Монгол улсад 400 доллараар нийлүүлэхээр болсноо АНУ-ын Гилеад Сайнсес Инк компанийн удирдлагууд албан ёсоор өнөөдөр мэдэгдлээ. Монгол Улсын Засгийн газар Эрүүл мэнд,спортын яам АНУ-ын Гилеад Сайнсес Инк компанийн хооронд элэгний архаг С вирүсийн халдварыг эмчлэх ХАРВОНИ эмийг Монгол Улсад “Аccess” буюу “Хүртээмж” хөтөлбөрийн хүрээнд нийлүүлэхэд хамтран ажиллахаар “Санамж бичиг”-т ЭМСЯ-ны Төрийн нарийн бичгийн дарга Г.Ганчимэг, АНУ-ын Гилеад Сайнсес Инк компанийн захирал ноён Аарон Бримкворф нар гарын үсэг зурлаа. Эрүүл мэнд, спортын сайд Г.Шийлэгдамба /2015.03.05/ АНУ-ын Санфранциско хотод айлчлах үеэрээ "Gilead Scienses" компаны төв байранд элэгний С вирүсийг эмчлэх ХАРВОНИ эмийг Монгол Улсад хөнгөлөлттэй үнээр нийлүүлэх талаар анхны уулзалтаа хийж байсан нь өнөөдөр ийнхүү ажил хэрэг боллоо.

АНУ-ын Gilead Sciences компани нь элэгний С вирүсийг эмчлэх ХАРВОНИ (Ледипасвир 90мг/Софосбувир 400мг) шахмал эмийг Канад улсын Patheon үйлдвэрт гэрээгээр үйлдвэрлүүлэн Монгол Улсад “Аccess” буюу “Хүртээмж” хөтөлбөрийн хүрээнд олон улсад нийлүүлэгдэж байгаа хамгийн хөнгөлөлтэй үнээр нийлүүлэхээр болж байна.

Эрүүл мэнд, спортын сайдын 2015 оны 196 дугаар тушаалаар батлагдсан хепатитийн С вируст халдварын илрүүлэг, оношлогоо, эмчилгээний зааврын дагуу дээрх эмүүдийг эмчилгээнд хэрэглэх юм. Өнөөдрийн байдлаар манай улсад 150 орчим мянган хүн С вирүсийн идэвхитэй халдвар тээгч байгаа бөгөөд, 50 гаруй мянган хүн яаралтай эмчлүүлэх шаардалгатай.