“MERS” вирус буюу Ойрхи-Дорнодын Коронавируст халдвараар БНСУ-д нийт 95 лабораториор батлагдсан тохиолдол бүртгэгдэж, 7 хүн нас бараад байна. Нас баралтын түвшин 7,3 хувь байгаа ажээ.

Тус улсад нийт 2,892 ойрын хавьтлыг илрүүлэн 2,729 гэрт, 163 эмнэлэгт хэвтүүлэн хяналтад аваад байна.

Эмч нар 58 өвчтний эмнэлзүйд дүн шинжилгээ хийхэд 90 хувьд халуурах, 34 хувьд ханиалгах, 22 хувьд цэр гарах, 22 хувьд ядрах шинж тэмдэг илэрсэн ба 17 хувьд артерийн даралт ихсэх нь ажиглагджээ. Эдгээр өвчтний 14 хувь нь чихрийн шижин, 12 хувь нь хавдартай хүмүүс байна.

Дэлхийн эрүүл мэндийн байгууллагын хамгийн сүүлийн мэдээгээр Саудын Араб улсад 8 лабораториор батлагдсан тохиолдол нэмж бүртгэгдсэн бол дэлхий дахинд нийт 1,250 батлагдсан тохиолдлоос нас баралт 449 байна.