Мексикийн Ciudad Acuna хотод хүчтэй хуй салхи буюу торнадо болж 13 хүн нас барсан тухай хэдхэн цагийн өмнө BBC мэдээллээ. Хуй салхи Texas-ийн Del Rio хилээс Coahuila муж хүрсэн бөгөөд энэ үеэр зуу зуун орон сууц гэмтэж, хот сүйрлийн байдалтай болсон байна. Мөн хүчтэй хуй салхины үеэр олон зуун иргэд шархдаж гэмтжээ.  

Coahuila мужийн захирагч Ruben Moreira гамшгийн бүс нутагт очиж нөхцөл байдалтай танилцахдаа "3 хүүхэд,10 том хүн нас барж, нэг бага насны хүүхэд алга болсон бөгөөд 150 гаруй хүн эмнэлэгт хүргэгдээд байна" хэмээн BBC-д ярьжээ.  

Мөн хуй салхины үеэр машин салхинд шидэгдэж, олон зуун айлын орон сууцыг нурааж гарз хохирол учруулжээ. "Нас барсан хүмүүс бүгд хуй салхины үеэр гадаа явж байсан бөгөөд дотор байсан хүмүүс бэртэж гэмтээгүй" хэмээн Ciudad Acuna хотын дарга Evaristo Lenin Perez хэлжээ.