Японд энэ сарын 11-ээс 17-ны хооронд хэт их халж, наранд цохиулсны улмаас хоёр хүн амь насаа алдаж, 480 гаруй хүн эмнэлэгт хүргэгдсэн тухай Японы гамшгийн удирдлагын төвөөс мэдээлжээ. Японы дийлэнх муж, бүс нутгаар болон Токиод цельсийн 30 градусаас илүү халсан байна. Энэ үеэр Токиод 39 хүн, Сайтамад 37 хүн, Окинавад 33 хүн тус тус эмнэлэгт хүргэгдсэн бөгөөд дийлэнх нь 65-аас дээш насныхан байжээ.

Харин нас барсан хоёр хүн Нагано болон Айчи мужийн иргэд байжээ. Японы цаг уурын хүрээлэнгээс болон гамшгийн удирдлагын төвөөс оршин суугчдыг халуун өдөр гадаа аль болох бага гарч, нарны малгай өмсөх, ус хангалттай уух мөн агааржуулагч хэрэглэхийг зөвлөж байна. Японы гамшгийн удирдлагын төвийн мэдээлж байгаагаар өнгөрсөн жилийн таваас есөн сарын хооронд хэт их халж, наранд цохиулсны улмаас 50,000 хүн эмнэлэгт хүргэгдэж байсан гэжээ.