Хятадын Гуйнши мужийн уулын бэлд нэг сартай хүүг амьдаар нь булсан байсныг олж аварчээ. Хүүхдийн эцэг эх нь хүү нүүрний гажигтай төрсөн учир хүнгүй газар булсан гэж Синхуа агентлаг мэдээлжээ. Хүү 4 дүгээр сарын 20-нд төрж, эмчилгээ хийлгэж байгаад 24-нд эмнэлгээс гарчээ. "Шинээр мэндэлсэн хүүхэд бүр төрсний гэрчилгээ авдаг боловч түүний эцэг эх нь авахаас татгалзсан" гэж эх барьсан эмч нь ярьжээ.

Хүүхдийг гэр бүлээсээ зайлуулахаар дөнгөж төрсөн хүүгийн эмээ 290 доллараар хүн хөлсөлжээ. Хөлсөлсөн хүн хүүг авч хайрцаганд хийгээд хоёр хонуулсны хойно үхсэн байх гэж бодоод уулын бэлд булжээ. Удалгүй тосгоны нэг иргэн хүүхэд уйлахыг сонсож цагдаа дуудсан байна. Цагдаа нар хүүхдийг ухаж гаргаад яаралтай эмнэлэгт хүргэжээ. Хүү төрөхдөө 3,5 кг байсан ч эмнэлэгт буцаж ирэхэд 2,6 кг болтол турсан байжээ.

Түүний гэр бүл болох эцэг, эх, эмээ зэрэг 5 хүнийг хүн алахыг оролдсон хэргээр эрүү үүсгээд байгаа юм байна. Харин тэд уучлалт гуйж хүүхдийг буцааж авмаар байна гэсэн өргөдөл бичсэн гэж Синхуа агентлаг мэдээлжээ.

Дашрамд дурдахад Хятадад жилд олон мянган хөгжлийн бэрхшээлтэй хүүхдүүд эцэг эхдээ хаягддаг байна.