Хятад улсын төвийн хэвлэл “Хуаси душибао” сонинд гарсан нэгэн нийтлэл тус орны блогчдын дунд хэлэлцүүлэг өрнөхөд хүргэжээ. Блогчид хүүхдийг өнчрүүлж буй өнөөгийн нийгмийг хурцаар шүүмжилж, хүүхдэд эцэг эхийн хайр халамж үгүйлэгдэж буй талаар ярилцаж байна. «Хуаси душибао» сонинд энэ сарын 4-ний өдөр Сычуань мужийн Баймяо тосгонд амьдрах Лулу хэмээх зургадугаар ангийн бяцхан охин 81 настай эмээдээ химийн хортой ус уулгаад дараа нь өөрөө ууж амиа хорлосон талаарх нийтлэл гарсан юм. Охин, эмгэн хоёрыг эмнэлэгт аваачсан ч охин маргааш өдөр нь нас барж, эмээ нь амьд гарсан ажээ. Энэ мэдээг дуулсан эцэг эх хоёр нь Бээжин хотоос тэр даруй нисэн ирсэн ч бүх зүйл нэгэнт оройтсон байжээ. Охины аав, ээж хоёр амьдрахын эрхээр Бээжин хотыг зорьж, цагаан сарын баяраар жилд ганц удаа л гэртээ ирж охинтойгоо уулздаг байсан гэнэ.

Эмээгээ асрах хэцүү бэрх амьдралаас төвдсөндөө ийнхүү бяцхан охин амиа хорлоход хүрсэн ажээ. Амьд үлдсэн эмгэн “Охины өгсөн уснаас хачин үнэр, амт мэдрэгдсэн учир бага уусан” хэмээн ярьжээ.

Дашрамд дурдахад Хятад улсад эцэг эхийнхээ хайр халамжийг амсалгүй, алс бөглүү тосгонд эмээ, өвөө, хамаатныхаа гар дээр 61 сая хүүхэд өсч байна. Тэдний 38 хувь нь зургаагаас доош насны хүүхдүүд бол 48 хувь нь 6-14 настай бөгөөд тэд өвөө, эмээтэйгээ цуг амьдардаг. Харин 11 хувь буюу 6.5 сая хүүхэд хамаатныдаа, үлдэх 3 хувь болох 2.1 сая хүүхэд өөрийн хүчээр, хэний ч туслалцаагүй амьдарч байгаа ажээ. Чухам энэ асуудал өдгөө Хятад улсад хурц сэдэв болоод байна.

Одоогоос 4 жилийн өмнө Гуандун тосгонд эгч дүүс болох 12, 11 настай хоёр охин, 9 настай хүү пестицид хэмээх бодисоор хордуулсан усыг амиа хорлох зорилгоор ууж нэг нь нас барсан эмгэнэлт явдал гарч байсан юм.