1990-ээд оны эхээр Хятадын уламжлалт биеийн тамирын дасгал “цигун”-ыг буддизм, даоизмын сургаальтай хослуулсан Фалунь Гун хэмээх сургууль Хятад улс даяар өргөн дэлгэрчээ. Үүгээр хичээллэгсдийн тоо хэдэн саяар тоологдож, өөрийн гэсэн үзэл суртлыг түгээн олон зуун салбар сургуулиуд Хятадын өнцөг булан бүрт байгуулагдсан юм. Хятад улсын хилийн гадна хүчтэй дэлгэрч, тархсан уг сургуулийг 1999 онд тус улсын төр засаг Коммунист намын үзэл сурталтай харш хэмээн үзэж албан ёсоор хориглосон юм. Ингэх болсон гол шалтгаан нь Фалунь Гун сургуулийн салбарууд нь 70 сая гишүүнтэй болж Хятадын Коммунист намын гишүүдийн тооноос давж гарсан байна. Үзэл сурталжсан тус улсад энэ бол түгшүүрийн харанга юм.  

Гэсэн хэдий ч Фалунь Гун-ыг дэмжигчид маш их хавчлагын дор Хятадад нууцаар үйл ажиллагаагаа явуулсаар байгаа ажээ. Хамгийн сүүлд гэхэд өнгөрсөн нэг сарын хугацаанд Хятадад Фалунь Гун-ыг дэмжигч 589 хүнийг баривчилж 83 хүнд хорих ял оноосон байна. Уг баривчилгааг Хятадын өнцөг булан бүрт явуулжээ. Хамгийн их нь Шаньдун мужид 106 хүн баривчлагдсан байна. Ляонинд 84 хүн, Цзилиньд 41, Гуандунд 40 хүн, Бээжинд 42 хүнийг тус тус баривчилжээ. Хамгийн өндөр настан нь Нанжин мужийн 88 настай Сун Юэ гэгч байсан бөгөөд түүнийг хэд хоног хорьж байгаад сулласан аж.

“Minghui” сайтын мэдээлж буйгаар Хятад даяар энэ оны эхний дөрвөн сард Фалунь Гун-ыг дэмжигч 1450 эрдэмтэн, сэхээтэн, инженер, профессор, дэд профессоруудыг баривчилсан аж. Өнгөрсөн 4 дүгээр сард хамгийн багаар тооцоход шүүх тус бүлгийн 162 гишүүний хэргийг хэлэлцэж 83 хүнд хоёроос найман жил хүртэлх хорих ял оноосон байна. Одоогийн байдлаар Хятадын Коммунист намын дараа гишүүдийнхээ тоогоор Фалунь Гун бүлгэм, сургуулийн дэмжигчид ордог байна. Тиймээс ч энэ том хүчийг тарааж, сарниулахыг Коммунист нам хүсдэг юм.

Өнгөрсөн онд Хятадад Фалунь Гун-ыг дэмжигч 6400 хүнийг баривчилснаас 91 нь мөрдөн шалгах явцад амиа алдсан хэмээн “Minghui” сайт мэдээлсэн байна. Харин улс даяар хориглосноос хойших 16 жилийн хугацаанд 60 мянган хүн амиа алдсан гэнэ.