Хэдхэн хоногийн өмнө Нигерийн цэргийн хүчнийхэн Боко Харам бүлгийн гараас хулгайлагдаад байсан Chibok тосгоны дунд сургуулийн 100 гаруй охид, эмэгтэйчүүдийг буцаан төрөлх нутагт нь авчирж чаджээ. Өнгөрсөн оны дөрвөн сард Нигерийн Chibok тосгоноос дунд сургуулийн 276 охидыг Боко Харам бүлгийнхэн хулгайлсан билээ. Охидыг сургууль дээрээ байх үеэр нь хулгайлж тэр цагаас хойш нэг жил өнгөрөөд байсан юм. Дашрамд дурдахад хулгайлагдсан 276 охидоос 50 гаруй нь сүүлд өөрсдөө зугтаж ирсэн байдаг. 

Үлдэх охидын талаар тус террорист бүлгийн удирдагч Абубакар Шекау “Тэд аль хэдийн лалын шашинд орcон, мөн манай цэргүүдтэй гэрлэсэн” хэмээн хэлж байжээ. Боко Харам бүлэгт охидоо алдсан эцэг эхчүүд өнгөрөгч сард “Бидний охидыг буцааж авчир” хэмээн хөдөлгөөн өрнүүлээд байсан билээ. 

Ямартаа ч Боко Харам бүлгийн гарт байсан 219 охидоос 100 гаруйг нь Нигерийн цэргийн хүчнийхэн суллаж чадлаа. Энэ тухай тус улсын дэд Ерөнхийлөгч "Бид охидыг аварч чадлаа. Цаашид ч цэргийн ажиллагаагаа идэвхтэй явуулж үлдсэн охидуудыг аврах болно" хэмээн мэдэгдэв. Тус бүлэг 2014 оноос хойш 2000 гаруй эмэгтэйчүүдийг хулгайлаад байгаа юм.