АНУ-ын гаалийн эрх баригчид 4 дүгээр сарын 24-ний өдөр олон нийтэд хандан албан ёсоор мэдээлэл хийсэн байна. Тэд Хятад улсаас оруулж ирсэн хүүхдийн хувцсыг шинжлэхэд хар тугалга хэт их хэмжээгээр илэрсэн тухай мэдэгдсэн юм. Тус улсын Нью-Йорк мужийн Левистон хотоос 3 дугаар сарын 19-нд хүүхдийн хувцаснуудыг хураан авч шинжилгээнд өгсөн ажээ. Шинжилгээний хариу 4 дүгээр сарын 24-нд албан ёсоор гарч хүүхдийн хувцсанд хар тугалгын хэмжээ их хэмжээтэй байгааг нотолжээ. Тиймээс уг хувцаснуудыг устгахаар болсон байна.

Мөн Хьюстоны далайн боомт дээр 3 дугаар сарын 4-ний өдөр гаалийн ажилтнууд Хятад улсаас ирсэн 6000 гаруй хүүхдийн үүргэвч, хүнс хадгалах сав зэргийг хураан авч шинжилгээнд өгөхөд мөн л хар тугалга их хэмжээгээр илэрчээ.  

Саяхан Нью-Йоркийн Эрүүл мэндийн газраас Хятадаас импортлон оруулж ирж байгаа бүтээгдэхүүнд хар тугалга ихээр агуулагдаж байгаа талаар анхааруулга гаргасан юм. Түүнд дурдсанаар хар тугалга нь хүүхдийн тоглоом, үдийн хоол хийдэг хуванцар сав зэрэг олон бүтээгдэхүүнд байгаа ажээ. 2007 онд АНУ хар тугалга агуулсан хэмээн 10.5 сая тоглоомыг Хятад руу буцааж байсан түүхтэй.

Хар тугалга нь хүүхдийн мэдрэлийн тогтолцооны эрхтнүүдэд сөргөөр нөлөөлдөг юм байна.