Балтимор хотод жагсагчид хууль сахиулах байгууллагын тээврийн хэрэгслийг шатааж, эмийн сан, дэлгүүр дээрэмдэх, гал тавих гэх зэрэг балмад үйлдэл гаргаж байгаа нь тус хотыг дэлхийн анхааралын төвд оруулаад байна. Ард иргэдийн энэхүү эмх замбараагүй жагсаалд АНУ-ын ерөнхийлөгч Барак Обама анхаарлаа хандуулж байр сууриа илэрхийлжээ.

Тэрээр BBC-д ярилцлага өгөхдөө, жагсагчдад хандан "Энэ бол жагсаал цуглаан биш, мөн хууль сахиулах арга хэмжээ биш, энэ бол хулгай дээрэм, үймээн шуугиан дэгдээж буй балмад хэрэг юм. Энэ явдал анх удаа гарч буй шинэ зүйл биш. Урт удаан хугацааны туршид үргэлжилж байна. Ийм балмад арга хэмжээ авлаа гээд асуудлыг өөрчилж чадахгүй. Хүн бүр энэ бол чухал ач холбогдолтой асуудал шүү дээ гэж ярьж байна. Гэхдээ эмийн сан, цагдаагийн тээврийн хэрэгслийг шатаалаа гээд асуудал өөрчлөгдөхгүй" хэмээн ярьсан байна.  

Тус эмх замбараагүй жагсаалын үеэр 200 гаруй хүнийг баривчилж, 100 гаруй машин эвдэрч сүйдэн, 15 байшин шатжээ. Энэхүү жагсаал нь энэ сарын 19-нд Америкийн Африк гаралтай 25 настай Freddie Gray хэмээх хар арьст залуу цагдаа нарын баривчилгааны улмаас нас барснаас үүдэн дэгсэн юм.