Өнөө өглөө хэвлэгдсэн Балбын “Himalayan Times” сонины мэдээлснээр хагас сайн өдөр болсон 7.9 магнитудын газар хөдлөлтийн улмаас амиа алдагсдын тоо 8000 хүрч болзошгүй талаар мэдээлсэн байна. Ройтерс агентлагийн хамгийн сүүлд мэдээлснээр нас барагсдын тоо 3218 хүрч, шархдаж бэртсэн хүмүүсийн тоо 6538 болоод байгаа ажээ.

Балба улсын Дотоод хэргийн яамны Онцгой байдлын газрын дарга Rameshvor Dangal “France Presse” аентлагт өгсөн ярилцлагандаа дээрх тоог батлаад “Энэтхэг, Хятадын иргэд гээд нийт гадаадын 90 гаруй хүн амиа алдсан” хэмээн хэлжээ.

Балба улсад эхний газар хөдлөлт нийслэл Катмандугаас баруун хойш 80 км-ын зайд хагас сайн өдөр орон нутгийн цагаар 11:41 цагт 7.9 магнитудын хүчтэй хөдөлсөн бол удаах нь 12:15 цагт 6.6 магнитудын хүчтэй 10 км-ын гүнд хөдөлжээ. Харин гурав дахь газар хөдлөлт нь 21:56 минутад болж 5.3 магнитудын хүчтэй байжээ. Тус бүс нутагт нийт 3,5-аас 6,9 магнитудын хүчтэй 50 удаагийн чичиргээ мэдрэгдсэн байна.

Газар хөдлөлтийн улмаас ЮНЕСКО-гийн Соёлын өвд бүртгэгдсэн 1832 онд баригдсан 62 м өндөр Дхарахара сүм нуран сүйрчээ. Мөн энэ үеэр Эверест уул руу 200 уулчин авирч байсан мэдээ байна. НҮБ-ын мэдээлснээр гамшгийн бүсд 6.6 сая иргэн амьдардаг бөгөөд Энэтхэгийн геофизикийн хүрээлэнгээс газар хөдлөлт ойрын 72 цагт дахин болж болзошгүй хэмээн анхааруулжээ.

Балба улсад 1934 онд газар хөдлөлт 8.5 мянган хүн амиа алдаж байсан ажээ.