Тамхины утаанд 4000 гаруй хорт бодис агуулагддаг ба эдгээрийн 50 гаруй нь хүний биед хорт хавдар үүсгэгч бодис юм. Хэдийгээр та өөрөө тамхи татддагүй ч гэсэн таны эргэн тойронд байгаа хүмүүс тамхи татаж, тэр орчинд нь та байгаа бол дам тамхидалтанд өртөж байна гэсэн үг юм. Дам тамхидалт нь хүүхэд, насанд хүрэгчдэд амьсгал, зүрх судасны өвчин үүсгэж үхэлд ч хүргэх аюултай гэдгийг мартаж болохгүй.

ДЭМБ-ийн тогтоосноор дэлхий нийтийн хүүхдүүдийн тэн хагас нь буюу 700 сая гаруй хүүхдүүд сургууль дээр, олон нийтийн газар ямар нэгэн байдлаар дам тамхидалтанд өртөж байна гэсэн судалгаа байна. Тиймээс та хүүхдээ болон өөрийгөө тамхи татдаг газар бүү байлгаарай.

Тамхи татдаг орчинд араагжуулагч, агаар сорогч, үнэр дарагч алийг нь ч сонгосон хангалттай өөрийгөө болон хүүхдүүдээ хамгаалж чадахгүй. Харин 100 хувь тамхигүй орчин л таны эрүүл мэндийн баталгаа байх болно гэдгийг санаарай.  

Дам тамхидалтанд өртсөн насанд хүрэгчдэд:

• Тархины цусан хангамж багасч, цус харвалт үүсэх
• Нүд хорсох, загатнах, нулимс гоожих, цаашилбал болор цайх, сохрох
• Уушигны хорт хавдраар өвчлөх эрсдэлийг 20-30 хувь нэмэгдүүлдэг
• Цусны судасны ханыг зузааруулж, нарийсгах бөглөрөл үүсгэх, зүрхний бах, шигдээс үүсгэх
• Мөн урагт нөлөөлж бага жинтэй хүүхэд төрөх, зулбах, хугацаанаасаа эрт төрөх, нярай гэнэт нас барах гэх зэрэг нөлөө үзүүлдэг байна.

Дам тамхидалтанд өртсөн хүүхдүүдэд:

• Тархины цусан хангамж багасч ой тогтоолт сэтгэн бодох чадвар буурах
• Тархины хавдар үүсэх
• Дунд чихний үрэвсэл үүсэх
• Гуурсан хоолойн үрэвсэлт өвчнүүд үүсэх, хүндрэх гэх зэрэг шинж тэмдэг илэрдэг байна.

Иймээс дам тамхидалтыг багасгах хамгийн нэн тэргүүнд хийх зүйл бол албан байгуулага олон нийтийн газар тамхи татах цэгийг байгуулах нь зүйтэй. Мөн тэднийг зөвхөн тамхи татах цэг дээр л татах зуршил бий болгох шаардлагатай болоод байна. 

Мөн бага насны хүүхдүүдэд тамхины хор уршгийг ойлгуулах, суртчилах танин мэдэхүйн сургалт явуулах нь ирээдүйд тамхи татдаг хүмүүсийн тоог багасгах нэг арга юм.