Англичууд Атлантын далайн ёроолоос Дэлхийн 2-р дайны үеэр живсэн онгоцонд байсан маш их хэмжээний мөнгөн зоос олжээ.

1942 оны 11-р сард, City of Cairo нэртэй 296 зорчигч, 100 тонн мөнгө ачсан усан онгоц Германы байлдааны шумбагч онгоцонд дайруулж Атлантын далайд сүйрсэн байна. Усан онгоц далайн түвшнээс доош 5,150 метрийн гүнд живж, 2011 оныг хүртэл олдоогүй байсан юм. Онгоц сүйрсэн байрлалыг олсны дараа Далайн Гүний Судалгааны багийнхан судалгааны ажлаа эхлүүлжээ.

City of Cairo-г сөнөөсөн Германы шумбагч онгоц

City of Cairo нь цэвэр мөнгөн рупи /Энэтхэг мөнгөн зоос/ -ийг Энэтхэгээс Англи руу зөөж байсан юм.

2011 онд Далайн Гүний Судалгааны багийнхны радарт живсэн усан онгоц байж болзошгүй дохио илэрч, удалгүй домог болсон City of Cairo онгоцыг олсноо зарласан юм. Усан онгоц хоёр хэсэг салж, шаварт булагдсан байжээ.

"Бид 3,000-4,000 метрийн гүнд ажиллаж байсан л даа. Гэхдээ City of Cairo-г судлахад маш хэцүү байсан" гэж судалгааны багийнхан ярьжээ. Тэдний 5,150 метрийн гүнээс мөнгөн зооснуудыг гаргасан нь дэлхийн дээд амжилт болоод байгаа юм.

Мөнгөн зооснуудыг аль 2013 онд гаргаж авсан ч гэсэн Английн засгийн газар нууцыг хадгалж байгаад өчигдөр л нийтэд зарласан байна. Английн засгийн газар зоосыг хайлуулж зараад Далайн Гүний Судалгааны багийнханд тодорхой хувийг өгсөн гэж BBC мэдээлжээ. 100 тонн цэвэр мөнгө бол одоогийн ханшаар 50 сая доллар юм.