АНУ-ын Юта мужийн анчин бүсгүй Ребекка Фрэнсисын нум сумаар харваж агнасан анаашны зураг нийгмийн сүлжээнд тавигдсан дороо хэдэн мянган уурссан сэтгэгдэлд даруулж, шүүмжлэлийн бай болов.  

Тэрээр анаашийг нум сумаар харваж алаад энэхүү гэрэл зургийг даруулсан аж. Дөрөвдүгээр сарын 13-ны өдөр Facebook-т тавигдсан энэ зурагны дор Английн жүжигчин Рикки Жерве "Ийм сайхан амьтныг алаад, дараа нь инээмсэглэж зогсон зургаа авахуулах нь чиний амьдралд тийм их хэрэгтэй байсан юм уу?" хэмээн сэтгэгдлээ бичжээ. Зурагны дор уурссан хэдэн мянган сэтгэгдлийн хариу болгож Ребекка Фрэнсис “Энэ анааш хөгширсөн, сүргээсээ хөөгдсөн, ганцаардсан байсан. Тун удахгүй үхэх байсан. Би түүнийг агнасан өөрийн шийдвэртээ одоо ч харамсахгүй” хэмээн тайлбар хийжээ. Анаашны махыг нутгийн иргэд хоол хүнсэндээ хэрэглэсэн бол ясаар нь гар урлалын бүтээгдэхүүн хийсэн гэнэ.  

Ребекка Франсис нь найман хүүхэдтэй бөгөөд жирэмсэн үедээ ч чөлөөт цаг гарвал ан хийхээр явдаг аж. Тэрээр баавгай, хандгай, буга, эрээн тахь гээд олон амьтныг нум сумаар харван агнаж байсан туршлагатай анчин юм. 2010 онд түүнд “Оны хамгийн их ан хийсэн анчин” шагналыг хүртээж байсан гэнэ.