Хятадын ардын армийн арын албыг хариуцсан материал техник хангамж, худалдан авах газрын дарга генерал Дун Минсяныг авлигын хэргээр баривчилсан тухай мэдээлсэн байна.  Өдгөө 62 настай генерал Дун Минсян өмнө нь Бээжингийн цэргийн тойргийн хангалтын албыг хариуцан ажиллаж байжээ. Тэрээр авлигын хэргээр он гарсаар баривчлагдаж буй армийн томоохон албан тушаалтан, гурав дахь генерал болж байна. Түүний орлогч асан Ся Шэньбай 2011 онд авлига авсан хэргээр шийтгэгдэж байсан билээ.

Генерал Дун Минсян

Хятадын генералуудын авсан авлигын хэмжээ, эд хөрөнгөнийх нь үнэлгээ жирийн хятад иргэдийн ой тоонд нь буухгүй байгаа юм. Тухайлбал саяхан үхсэн Хятадын ардын армийн хоёр дахь нөлөө бүхий хүн гэгдэж байсан генерал Сюй Цайхоугийн хөрөнгө 3.5 тэрбум ам.доллараар үнэлэгдсэн бол Хятадын ардын армийн материал техник хангамжийн албаны орлогч дарга Гу Цзюньшаний эд хөрөнгө, хадгаламж нь 32 тэрбум ам.доллараар үнэлэгджээ.   

Энэ долоо хоногийн эхээр БНХАУ-ын хэвлэл мэдээллийн хэрэгслүүдээр Цэргийн төв комиссын орлогч дарга, генерал Го Босюныг эхнэр, хүүхдийнх нь хамт баривчилсан тухай мэдээлсэн билээ.  

Генерал Го Босюн

БНХАУ-ын дарга Ши Жиньпиний эхлүүлсэн авлигын эсрэг компанит ажлын үр дүнд 2014 онд 16 генерал баривчлагдсан бол 2012 оноос хойш нийт 32 цэргийн өндөр албан тушаалтнууд хээл хахуулийн хэргээр яллагдаад байна.