Эрүүл мэнд, спортын дэд сайд Д.Атармаагаар ахлуулсан Дархлаажуулалтын зөвлөх хороо, Тарилгатай халдварт өвчний тандалтын ДЭМБ-ын зорилтын хэрэгжилтийг баталгаажуулах хорооны өргөтгөсөн хурлыг өнөөдөр ЭМСЯ-ны шуурхай удирдлагын төвд зохион байгууллаа.

Тус хурлаар Монгол Улсад 2015 оны 3 дугаар сараас эхлэн бүртгэгдэж буй улаанбурхан өвчний дэгдэлтийн байдал, ДЭМБ-ын НДББ-ын Улаанбурхан өвчний тархалт, тархалтыг таслан зогсоосныг баталгаажуулах хорооны 4-р хурлын мэдээллийг танилцуулав.

Хуралд оролцогсод улаанбурхан өвчний хариу арга хэмжээний талаар дэлгэрэнгүй санал солилцож, “Дархлаажуулалтын 10 хоног”-оор улаанбурхан өвчний эсрэг нэмэлт дархлаажуулалтыг 6 дугаар сараас эхэлж 5 насны хүүхдүүдийг хамруулан хийх бэлтгэл ажлыг сайтар ханган ажиллах шийдвэр гаргалаа.

Улсын хэмжээнд 4 дүгээр сарын 12-ны өдрийн байдлаар Улаанбаатар хотын 7 дүүрэг, Өмнөговь, Өвөрхангай, Дархан-Уул аймагт улаанбурхан өвчний 1093 сэжигтэй тохиолдол бүртгэгдсэнээc 236 тохиолдол (22%) нь лабораторийн шинжилгээгээр батлагдаад байгаа юм.