Дубайд болж буй Нээлттэй шатрын тэмцээний үеэр Гүрж улсын шатрын аварга Gaioz Nigalidze ичгүүртэй байдлаар тэмцээнээс хасагдлаа. Тэрээр Армянийн шатарчин Tigran Petrosian-тай зургадугаар тойргийн тоглолтоо хийж байж.

Удалгүй Tigran Petrosian зохион байгуулагчдад "Gaioz Nigalidze хэтэрхий олон удаа ариун цэврийн өрөө ороод байна" гэж гомдол гаргажээ. Зохион байгуулагчид гүрж шатарчны орсон ариун цэврийн өрөөнд бочкиний араас нойлын цаасанд боосон гар утас олсон байна. Уг утсаар facebook-ийн шатрын тоглоомд холбогдсон байжээ.

Gaioz Nigalidze минийх биш гэж гүрийсэн ч утсан дээрх шатрын тоглоом нь түүний нүүдлүүдтэй таарч байсан учраас түүнийг тэмцээнээс хөөж гурван жилийн хугацаагаар шатрын тэмцээнд оролцох эрхийг нь хасчээ.

Гүржийн шатрын холбоо "Маш муухай хэрэг боллоо, гэхдээ эхлээд оролцогчийн үгийг сонсож байгаад шийдвэр гаргах хэрэгтэй байсан юм" гэжээ.

Gaioz Nigalidze 26 настай чансаагаараа дэлхийд 400-д бичигддэг юм байна. Одоогоор тэр ямар нэгэн тайлбар хийгээгүй, хэнтэй ч холбогдохыг хүсэхгүй байгаа юм байна.

Сүүлийн жилүүдэд шатрын тэмцээн дээр электрон хэрэгсэл ашиглан хуурах тохиолдол гарах болсон. Уг явдал шатрын тэмцээнийг өндөр хяналт, шалгалтын дор явуулж байх сануулга болжээ.