Өнөөдөр Пүрэв гарагийн өглөө Парисын цагаар 02:50 цагийн орчимд Францын телевизийн TV5 Monde суваг хакеруудын дайралтад өртөн нэвтрүүлэг нь бүрэн тасарсан байна. Тус хакерын довтолгооны хариуцлагыг “Исламын улс” бүлэглэлийн кибер террорист бүлэг хүлээхээ мэдэгджээ. Хэдхэн цагийн дотор хакерууд TV5 Monde сувгийг ажиллагаанаас гаргаж ямар ч дохио дамжуулах боломжгүй болгож орхижээ.

Энэ тухай тус сувгийн гүйцэтгэх захирал Yves Bigot “Бид аажмаар хэд хэдэн бүс нутагт өргөн нэвтрүүлгээ сэргээж эхэлж байна. Халдлагын улмаас манай систем маш ноцтой гэмтсэн. Гэмтлийг бүрэн засварлаж сэргээхийн тулд олон цаг шаардагдана” хэмээн “France-Presse” агентлагт өгсөн ярилцлагадаа дурдсан байна.

Өөрсдийгөө "Kiberhalifat" хэмээн нэрлэсэн этгээдүүд лхагва гарагийн шөнийн 22:00 цагаас эхлэн TV5 Monde суваг руу довтолж эхэлжээ. Тус суваг хэд хэдэн удаа тасалдаж байснаа шөнө дундын үед ямар ч дуу авиагүй, дэлгэц нь хар өнгөтэй болж орхисон байна.

TV5 Monde суваг руу халдсан кибер террористууд фэйсбүүкээр дамжуулан Африк, Ойрхи Дорнодод исламистуудын эсрэг үйл ажиллагаа явуулж буй Францын цэргүүдийг заналхийлжээ.

Одоогоор тус телевизийн албан ёсны вэб сайт ажиллахгүй байна. TV5 Monde суваг нь дэлхийн 200 улс оронд нэвтрүүлгээ цацдаг юм.