Нийслэлийн Налайх дүүргийн 3 дугаар хорооны нутагт иргэн Л-ийн нүүрс олборлох аманд нуралт үүсч дөрвөн хүн дарагдсан тухай дуудлагыг өчигдөр өдрийн 11:40 цагт тус дүүргийн ОБХ хүлээн авчээ. Уул уурхайн аврах ангийн 22 албан хаагч, таван автомашинтайгаар шуурхай ажилласны үрээр иргэн Б /38 настай, эрэгтэй/, иргэн С /31 настай, эрэгтэй/, иргэн А /30 настай, эрэгтэй/ нарыг амнаас эсэн мэнд гарган авч дүүргийн Нэгдсэн эмнэлэгт хүргэсэн байна. Харамсалтай нь тэдгээр иргэдтэй хамт нүүрс олборлож байсан иргэн Н /38 настай, эрэгтэй/ нас барсан байжээ. Түүний цогцсыг нуранганаас гаргаж, дүүргийн Цагдаагийн хэлтэст хүлээлгэн өгсөн байна.