Хэдхэн сарын өмнө “Монос”-ын эмийн санчийн ажилдаа хариуцлагагүй хандсаны улмаас 16 нярай “Фенобарбитал” эмэнд хордож нийгэм даяараа шуугиж байлаа. Эцэст нь хоёр эмийн санч тэнсэн харгалзах ял аваад намжсан. Харамсалтай нь “Монос”-ынхон дахиад ажилдаа хариуцлагагүй хандсаны улмаас найман хүүхэд эмэнд хордсон хэрэг гараад байна. ЭХЭМҮТ-ийнхөн харшил, амьсгалын замын үрэвсэл, бөөрний дутагдал, цусны өвчний үед уудаг “Ланадексон” эмийг “Монос”-руу утсаар захиалжээ. Гэтэл захиалсан эмийн оронд “Лансорбид” хэмээх зүрхний архаг дутагдлын үед уудаг эмийг андууран өгчээ. ЭХЭМҮТ-ийн эмч, сувилагч нар ч андуурч ирсэн эмийг анзааралгүй цусны эмгэг, хавдартай найман хүүхдэд 180 ширхэгийг дөрвөн өдрийн турш уулгажээ. Хүнд өвчинтэй тэмцэж буй хүүхдүүдэд зүрхний архаг дутагдлын үед уудаг эмийг том хүний тунгаар өгсөн энэ хэргийн хариуцлагыг ЭХЭМҮТ-ийн эмч нар 100 хувь үүрч байгаа ажээ. Эм уусан хүүхдүүдийн хувьд эмийн сөрөг нөлөө илрэх нь цаг хугацааны асуудал болчихоод байна.