БНХАУ-ын Олимпийн зохион байгуулах хорооноос албан ёсоор “БНХАУ-ын иргэд гадаадын нийгмийн сүлжээг таашаадаггүй” хэмээн мэдэгдсэн нь хятадын блогчдын зүгээс ихээхэн шүүмжлэлд өртөж бас доог тохууны бай болов. Нэгэн хятад залуу блог дээрээ “Хаашдаа л хятадууд гадаадын нийгмийн сүлжээг таашаадаггүй, дургүй л юм бол яагаад тэднийг хааж сүржигнээд байгаа юм бэ?” гэж асуужээ.

Тус улс нь 2022 оны өвлийн олимпийг өөрийн эх орондоо Харбин хотод зохион байгуулахаар нэрийг нь дэвшүүлээд байгаа билээ. Олимпийн зохион байгуулах хорооны орлогч дарга Ван Хуй “Хятад бол нээлттэй улс. Олон улсын олимпийн хорооноос албан ёсоор батлах юм бол Хятадад гадаадын жуулчид ямар нэгэн хязгаарлалтгүйгээр интернет ашиглах боломжтой байх болно” гэсэн юм.

Харамсалтай нь тус улсад “Facebook”, “Twitter”, “YouTube” болон бусад олон тооны томоохон хэвлэл мэдээллийн хэрэгсэл, нийгмийн сүлжээ хаалттай байдаг билээ.

Хятадын Коммунист намын эрх баригчид ганцхан өдрийн дотор 31 онлайн хэвлэлийг хааж байлаа.  Хамгийн сүүлд гэхэд энэ сарын 20-нд олон улсын мэдээллийн агентлаг "Reuters"-ийг хаасан юм. БНХАУ-д хаалттай сайтуудын жагсаалт “New York Times”, “Wall Street Journal”, “Bloomberg News” түүнчлэн "Epoch Times" гээд уртаас урт үргэлжилдэг нь харамсалтай.