Монголчуудад аль хэдийн танил болсон “Тираннозавр батаар”-аас гадна үлэг гүрвэлтэй холбоотой 22 олдворыг АНУ-аас Монгол Улс хүлээн авсан билээ. Энэ олдворуудаараа Үлэг гүрвэлийн төв музей маргаашнаас эхлэн танин мэдэхүйн үзэсгэлэн зохион байгуулах гэж байна. Уг үзэсгэлэнд Монгол улсаас олддог эвэрт үлэг гүрвэл Протоцератопс, нэгэн үе Р.Ч.Эндрюсийн өндөгний хулгайч хэмээн тодорхойлж байсан Овираптор, хуягт үлэг гүрвэл Анкилозавр, тэмээн хяруул маягийн Орнитомимозавр зэрэг үлэг гүрвэлүүдийн олдворыг дэлгэн үзүүлэх ажээ.