Ерөнхий сайд асан  Н.Алтанхуягийн хүргэн Г.Дэнзэнг гэр бүлээрээ хил даван оргон зайлсан гэсэн  мэдээлэл хэвлэлээр гарсан.

"Эрдэнэс таван толгой"-н захирал Я.Батсуурийг улсын мөнгө шамшигдуулсан, албан тушаалаа урвуулан ашигласан хэмээн АТГ-аас саатуулж, уг хэрэгтэй холбогдуулан  Г.Дэнзэнг хууль хяналтынхан шалгах гэсэн ч түүнтэй холбоо тогтоож чадахгүй байгаа мэдээлэл хэвлэлээр цацагдсан юм.  Тэгвэл сураггүй алга болсон гэх Г.Дэнзэн Германаас захидал ирүүлжээ.

Тэрээр захидалдаа:

-"Монгол Улсын иргэн Г.Дэнзэн миний биеийг хил даван оргон зайлсан гэх огт үндэслэлгүй, ээлжит гүтгэлгийг хэвлэл мэдээллийн хэрэгсэл ашиглан зориудаар нийтэд түгээж буйг залруулахын тулд уг ил захидлыг бичиж байгааг минь ойлгон хүлээн авна уу.

Намайг чиглэсэн олон удаагийн гүтгэлэг нь эхэндээ улс төрийн зорилготой байсан бол одоо хэрээс хэтэрч эдийн засгийн бүлэглэлүүдийн хуйвалдаанаа далдлах явцуу эрх ашгийн зорилготой болж өөрчлөгдсөнийг залуу хүний хувьд зүгээр хараад сууж тэвчсэнгүй. Надад хийсэн гэм байхгүй учир би буруугүй хэмээн тайлбарлаж, олон зүйл тоочих шаардлагагүй гэж бодож байна.  Хоёр жил гаруй үргэлжилж буй энэ гүтгэлэгтэй холбогдуулан өнөөдрийг хүртэл намайг хуулийн байгууллагаас зарлан дуудаж, шалгасан нэг ч тохиолдол байхгүйг энд зориуд хэлэх нь зүйтэй байх. Хэн нэгний гэм буруутай эсэхийг гүтгэлэг доромжлолоор бус Монгол Улсын шүүх шийддэг гэж бодож байна. Харин үнэн зүйлийг хэлж ярьсан нь хэлмэгддэг болсон энэ нийгэмд цаашид хэрхэхийг би мэдэхгүй.

Дахин хэлэхэд миний бие ямар нэгэн хэргээс зугтан эх орноосоо дүрвэж, оргон зайлсан зүйл огт байхгүй болно. Одоогоор ХБНГУ-д сургалтад сууж байгаа бөгөөд ирэх 4 дүгээр сарын 02-нд хичээлээ дуусгаад эх нутагтаа очно. Эх орондоо байхгүй байгааг минь ашиглан гүтгэлгийн шинжтэй мэдээ мэдээллийг зориудаар тараахгүй байхыг хичээнгүйлэн хүсье.  Та бүхнийг хүндэтгэсэн Монгол Улсын иргэн Г.Дэнзэн 2015.03.10" гэжээ.