Украины Донецк хотын ойролцоо байдаг Засядко-ийн нүүрсний уурхайд томоохон хэмжээний дэлбэрэлт гарч 30 хүн үрэгдэн 14 хүн гэмтэж бэртсэн талаарх мэдээ дөнгөж сая ирлээ. Эдгээр уурхайчдаас гадна 73 хүн нурангид дарагдсан байгаа юм байна. Гэхдээ албаны эх сурвалжийн мэдээлж байгаагаар уурхайд 200 орчим хүн ажиллаж байсан байна.

Тус уурхайн хөдөлмөр хамгааллын албаны даргын мэдээлж байгаагаар газар доорхи тэсэлгээний төхөөрөмжийн хий алдагдсанаас хүчтэй дэлбэрэлт гарсан ажээ. Тус уурхайд 2007 онд энэ төрлийн дэлбэрэлт болсны улмаас 106 хүний алтан амь нас эрсэдсэн хэрэг гарч байсан бөгөөд дахин дэлбэрэлт болсон нь олны ундууцлыг ихээр төрүүлж байна.