Өнгөрсөн сарын сүүлчээр кино урлагийн дээд шагнал гардуулах ёслол Оскарын наадам болж өндөрлөсөн билээ. Оскарын улаан хивсний ёслолын үеэр дэлхий дахины анхаарлыг татаж, нүдийг булааж байсан алдартан бол яахын аргагүй "12 жилийн боолчлол" киноны гол дүрийн жүжигчин Люпита Неонго байсан гэхэд маргах хүн үгүй биз. Тэрээр битүү сувдаар чимэглэсэн 150 000 долларын үнэтэй чамин даашинзаар энэ жилийн кино наадмын шагнал гардуулах ёслолд гангарч олны нүдийг хужирласан. Тэгвэл уг даашинз түүний байрлаж байсан зочид буудлаас нь хулгайд алдагдсан бөгөөд цагдаа нар хэргийг шалгаж байгаа аж.