Европын цуврал тэмцээнүүдэд оролцож буй Монголын жүдочид өнгөрсөн амралтын өдрүүдэд Польш, Чехэд болсон Европын аварга шалгаруулах нээлттэй тэмцээнд зодоглолоо.

Польшийн нийслэл Варшавт болсон эрэгтэйчүүдийн Европын АШТ-д манай таван жүдоч зодоглосноос 73 кг-ийн жинд хүч сорьсон ОУХМ Г.Одбаяр түрүүлэн,

+100 кг-д Ө.Дүүрэнбаяр хүрэл медаль хүртжээ. Харин 81 кг-д О.Ууганбаатар, Н.Дагвасүрэн нар эхний даваанд ялагдаж, 90 кг-д Х.Цогтгэрэл гурван тойрог барилдаж тэмцээнээ өндөрлүүлсэн байна.

38 орны 255 жүдоч барилдсан уг тэмцээнд гурван алт, хоёр мөнгөн медальтай БНСУ-ын жүдочид тэргүүлж, Монголын тамирчид багийн дүнгээр IV байр эзэлжээ. Харин Чехийн нийслэл Прагад болсон эмэгтэйчүүдийн Европын АШТ-д манай дөрвөн жүдоч зодоглосноос 52 кг-ийн жинд М.Бундмаа, 63 кг-д Ц.Цэрэннадмид нар хүрэл медаль хүртэж, 63 кг-д Ц.Мөнхзаяа V, 70 кг-д Ц.Наранжаргал VII байрт шалгаран, багийн дүнгээр 36 орноос XII байранд оров. 

                                                                                                                         Г.Золзаяа