Монголын загвар зохион бүтээгчдийн бүтээл дэлхийн алдартай загвар зохион бүтээгчдийн сонирхлыг их татах болжээ. Нью-Йоркийн загварын долоо хоногт  бүтээлээ толилуулсан манай дизайнерүүдийн урласан үндэсний хувцасны загвар хийц, эсгүүр, оёдол, өнгөнд  нүүдэлчдийн амьдрал, ахуйн онцлог, хэв маяг шингэсэн байдаг  нь гадныханд тун өвөрмөц санагддаг бололтой.

Энэ сарын 13-нд болсон Нью-Йоркийн загварын долоо хоногт Б.Баярмаагийн 2015 оны намар, өвлийн хувцасны коллекци үзэгчдийн анхаарлыг татсан байна. Тэрбээр “It girl” коллекцидоо Монгол үндэснийхээ хэв маягийг шингээж, дайчин эрэмгий дүр төрхийг харуулахын тулд сонирхолтой үзүүлбэр бэлдсэн аж. Түүнийг "Моносоник"-ийн Баярхүүгийн том охин гэдгээр хүмүүс мэднэ. Үе, үехэн этгээд содон хувцаслалтаараа шар хэвлэлийн нүүрийг чимдэг түүний загваруудтай танилцана уу.

Энэ тухай thepenisula.com сайтад “Шоу эхлэхэд Монгол үндэсний сүрлэг аялгуу хүнгэнэж, загвар өмсөгчид ан хийж буй мэт бүжиглэнэ. Эрэлхэг зоримог охидыг харуулсан энэ коллекци өвөрмөц сонирхолтой болжээ” хэмээн бичжээ.

Тэгвэл түүний “It girl” коллекцийг үзсэн Екатерина Высоковская хэмээх орос бүсгүй өөрийн блогтоо “Загвар зохион бүтээгч Б.Баярмаагийн бүтээл морин хуурын сүрлэг аялгуугаар эхэлсэн нь тэнд хүрэлцэн ирсэн үзэгчдийг өөрийн эрхгүй алмайруулан гайхашруулсан юм.

Түүний загварын бүтээлд хурц тод өнгө зонхилсон нь сүрдэм, бас биширмээр сэтгэгдэл төрүүлж байлаа. Дизайнер бүсгүй эх орондоо 2005 онд өөрийн урласан загварын бүтээлээ анх танилцуулж байсан бол өдгөө дэлхийн үзэгчдэд толилуулах хэмжээнд хүрчээ.

Тэрбээр өвөрмөц сэтгэлгээтэй дизайнер юм. Монгол үндэсний хувцсаа орчин үеийн сонгодог загвартай хослуулж өдөр тутам өмсөж болохоор энгийн загвартай урласан нь бүтээлийнх нь  бусдаас ялгарч чадах гол онцлог байв.

Сэтгэл, зүтгэл гаргаж хөдөлмөрлөсөн нь урласан бүтээлүүдээс нь тодорхой харагдсан. Б. Баярмаа загвараа төрөл бүрийн материалаар урлаж, чимэглэлийг нь гар аргаар хийсэн нь  онцгой содон харагдсан.

Түүний бүтээсэн үндэсний хувцасны загварыг Шакира, Рианна гээд дэлхийн одууд өмссөн байхыг үгүйсгэхгүй юм” хэмээн дүгнэн бичжээ.Тэрбээр өмнө нь “Mercedes Benz” загварын долоо хоногт өвөл, намрын коллекцио танилцуулсан нь мөн л  олны анхаарлыг татсан юм.

                                                                                                                        Г.Золзаяа