ОУХМ Э.Халиунболд АНУ-д хоёр сарын хугацаанд дэлхийн хоёр удаагийн аварга Sebastian Tortelli-ын багт бэлтгэл сургуулилтаа базааж, Калифорниа мужид энэ сарын 15-нд болсон "Dirt Series-2015" уралдаанд 450 cc Open ангилалд тэргүүлж, алтан медаль хүртсэн талаар бид өмнө нь мэдээлсэн. Тэгвэл тэрбээр өчигдөр Лос Анжелес Каунтид зохион байгуулагдсан "Mammoth-2015" уралдаанд амжилттай оролцжээ.

АНУ-ын Мотоциклын Холбооноос LARC талбайд энэ сарын 22-нд зохион байгуулсан уралдаанд Pro 25+ ангилалд II байрт шалгарсан байна. Уралдаанд Суперкроссын энэ жилийн ДАШТ-ий 250 сс ангиллын эхний гараанд тэргүүлсэн, одоогоор нийлбэр дүнгээр II байрт явж буй TRD/Redbull/KTM/Lucas Oil багийн тамрчин Jessy Nelson, ирээдүйн аварга хэмээгдэж буй Rookie White, АНУ-ын Мотоциклын Холбооны "Алдрын Танхим"-д нэрээ мөнхөлсөн аваргууд гээд 600 орчим тамирчин өрсөлдсөн томоохон уралдаан болжээ. Энэ уралдаан нь Суперкроссын ДАШТ-ий дараа эрэмбэлэгддэг Loretta Lynn уралдаантай өрсөлдөхүйц түвшинд хүрээд буй.

Өнгөрсөн жил Loretta Lynn уралдаанд Э.Халиунболд IV, V байр эзэлж, Transworld Mx уралдааны баруун бүсийн аваргын алтан медаль хүртэж байсан билээ.

                                                                                                                           Г.Золзаяа