Манай улс энэ оны албан ёсны анхны зочноо маргааш хүлээн авна. УИХ-ын дарга З.Энхболдын урилгаар ОХУ-ын Холбооны хурлын Төрийн  ДУМ-ын дарга Сергей Евгеньевич Нарышкин энэ сарын 15-16-нд манай улсад  айлчлах  юм. Тэрээр айчлалынхаа үеэр УИХ-ын дарга З.Энхболдтой хэлэлцээ хийж, Ерөнхийлөгч Ц.Элбэгдоржид бараалхана. Мөн маршал Г.Жуковын хөшөөнд цэцэг өргөж музейд нь зочлох ажээ. Халх голын дайнд  оролцсон дайчдын үнэмлэхийг Батлан хамгаалахын яаманд хүлээлгэн өгч, “Монгол-Оросын харилцааны түүх, уран зохиол” сэдэвтэй дугуй ширээний уулзалт  ярилцлагад оролцох юм байна.

2013 оны 11 дүгээр сарын 24-25-нд  Улаанбаатарт болсон УИХ-ын гишүүд болон ОХУ-ын  Төрийн  ДУМ-ын төлөөлөгчдийн уулзалтын үеэр  Монгол-Оросын парламентийн бүлгийн дарга Л.Цог Төрийн  ДУМ-ын даргыг  Монголд айлчлахыг  хүссэн  УИХ-ын даргын урилгыг уламжилж байжээ.

Сергей Евгеньевич Нарышкин 2011 оны 12 дугаар сард ОХУ-ын Холбооны хурлын Төрийн  ДУМ-ын даргаар томилогдсон юм.