Энэ сарын 6-7-нд Австри улсын Вольфурт хотод 24 дэх удаагийн “Flatz Austria Open” олон улсын уламжлалт тэмцээн эмэгтэйчүүдийн чөлөөт бөхийн барилдаан гурван насны ангиллаар 19 орны 217 бөх зодоглолоо. Тэмцээнд ОУХМ Э.Нарангэрэл /”Хангарьд” клуб, 48 кг/, П.Орхон /”Алдар” спорт хороо, 55 кг/, С.Бямбацэрэн /”Аврагч” спорт хороо, 58 кг/, Гавьяат тамирчин С.Цэрэнчимэд /”Алдар” спорт хороо, 63 кг/, Н.Анударь /охидын 49 кг/ нар оролцов. Эмэгтэйчүүдийн үндэсний шигшээ багийг  гавьяат дасгалжуулагч Б.Батбаяр, П.Чулуунбаатар нар дасгалжуулж, олон улсын шүүгчээр Л.Нямчулуун ажилласан.

48 кг-ийн жинд 11 бөх барилдсанаас Э.Нарангэрэл нэгдүгээр тойрогт Унгарын бөх Мелана Паррыг 10:0 онооны харьцаагаар хожиж, хагас шигшээд Польшийн бөх Сара Жезейыржанскаг цэвэр хожин, шувтаргын барилдаанд Польшийн бөх Александра Михаликийг 10:0 онооны харьцаагаар ялж алтан медаль хүртэв. 55 кг-ийн жинд 14 бөх барилдсанаас П.Орхон эхний тойрогт францийн бөх Хиллару Хонофинийг 12:2 онооны харьцаагаар хожиж, дараа нь хоёр барилдаанд өрсөлдөгчөө буулган авч шувтрагын барилдаанд Германы бөх Лаура Мертенцийг 4:0 онооны харьцаагаар ялан дийлж аварга боллоо. 58 кг-ийн жинд зургаан бөх зодоглосноос С.Бямбацэрэн нэгдүгээр тойрогт хийлж хоёрдугаар тойрогт Польшийн бөх Катерзина Михаликийг 4:0, шувтаргын барилдаанд Польшийн бөх Александра Волзинскийг 10:0 онооны харьцаагаар өвдөг шороодуулан алтан медаль хүртлээ.

63 кг-ийн жинд есөн бөх барилдсанаас С.Цэрэнчимэд нэгдүгээр тойрогт Австрийн бөх Иванна Инглишийг 4:0, хоёрдугаар тойрогт Польшийн бөх Зеата Федеревскаг 11:2, хагас шигшээд Польшийн бөх Изабеллаг Стралкаг 10:2, шувтаргын барилдаанд Италийн Сара де Колийг 12:8 онооны харьцаагаар хожиж түрүүлжээ. Өсвөрийн 49 кг-ийн жинд барилдсан Н.Анударь нэгдүгээр тойрогт польшийн бөх Каролина Стрижукийг 8:2, хагас шигшээд Словакийн бөх Нина Колораваг 2:2 онооны харьцаагаар дийлэн, шувтаргын барилдаанд Австрийн бөх Еллен Риестерерт 1:2 онооны харьцаагаар дийлдэж мөнгөн медаль зүүсэн юм.

Насанд хүрэгчдийн 53 кг-ийн жинд Германы бөх Елена Хейк Брюггер, 60 кг-ийн жинд Шведийн бөх Т.Перссон, 69 кг-ийн жинд Шведийн бөх Моа Нюрген, 75 кг-ийн жинд Унгарын бөх Вивен Шараз нар түрүүллээ. Манай бөхчүүд энэ сарын 13-15-нд Швед улсад зохиогддог чөлөөт бөхийн уламжлалт “Клиппан хатагтай” олон улсын тэмцээнд оролцоно. Тус тэмцээнээс Б.Оюунсүрэн 2011 онд хүрэл медаль авч байв.

                                                                                                                              Г.Золзаяа