Ес дэх өдрөө болж буй Азийн зуны спортын XVII наадам чөлөөт бөхийн болон боксын тамирчид медалийн буухиаг өчигдөр амжилттай үргэлжлүүллээ. Боксын эмэгтэйчүүдийн 51 кг-ийн жинд ОУХМ М.Нандинцэцэг хүрэл медалийн болзол хангаж, мөнгөн медалийн төлөө тулалдахаар шалгарав. Мөн чөлөөт бөхийн дөрвөн тамирчин зодоглож, гурав нь медаль хүртлээ.

Эмэгтэйчүүдийн 55 кг-д ОУХМ С.Бямбацэрэн мөнгө, 75 кг-д дэлхийн аваргын мөнгө, хошой хүрэл медальт, гавьяат тамирчин О.Бурмаа, эрэгтэйчүүдийн 97 кг-д Азийн аварга Д.Хүдэрбулга нар тус тус хүрэл медаль хүртсэн юм. Тэгвэл өнөөдөр өндөрлөх чөлөөт бөхийн барилдаанд:

61 кг-ийн жинд ОУХМ Т.Түвшинтулга Энэтхэгийн бөх ДАШТ-ий хүрэл медальт Баржангтай өрсөлдөнө.

74 кг-ийн жинд ОУХМ Д.Гомбодорж Өмнөд Солонгосын бөх Сангкю Литэй хүч үзнэ.

86 кг-ийн жинд ОУХМ П.Өсөхбаяр Тайландын бөх Метее Тепакомтай зодоглоно

125 кг-ийн жинд ОУХМ Ж.Чулуунбат Арабын Нэгдсэн Эмират Улсын Мохаммед Салемтай барилдана.

                                                                                                                         Г.Золзаяа