Өнгөрөгч оны сүүлээр онгоцонд самраар үйлчилсэнгүй хэмээн уурлаж, хувийн харилцаа, уураасаа болж олон хүнд төвөг учруулж, хөөрсөн онгоцыг буцааж газардуулсан “Korean Air”-ийн дэд ерөнхийлөгч Чо Хюн А-г шүүх хурал өчигдөр Сөүл хотноо боллоо. Шүүх хурлын үеэр Чо Хюн А өөрийн гаргасан үйлдэлдээ харамсаж байгаагаа мэдэгдсэн ч өөрийгөө агаарын тээврийн хууль зөрчөөгүй гэсэн нь Солонгосчуудыг бухимдахад хүргэжээ. Энэ талаар түүний өмгөөлөгч хэлэхдээ  “Чо онгоцонд ямар үйлдэл гаргаснаа ерөнхийдөө хүлээн зөвшөөрч байгаа. Харин агаарын тээврийн аюулгүй байдлын хууль зөрчөөгүй. Онгоц нисэх зурвасаас ердөө 17 метр хол яваад л буцсан” гэж хэлжээ.